Կարմրավոր Ս. Աստվածածին եկեղեցի

Կարմրավոր Ս. Աստվածածին եկեղեցի: Հայկական ճարտարապետական հուշարձան, խաչաձև գմբեթավոր փոքր կառույցների բնորոշ և անաղարտ պահպանված նմուշներից: Գտնվում է Աշտարակի հյուսիս-արևելյան բարձրադիր մասում: Կառուցվել է 7-րդ դարում:

Ըստ նորագույն հետազոտությունների այս տիպը Հայաստանում զարգացած է եղել դեռևս 5-րդ դարում և ունեցել է բազմաթիվ օրինակներ: Կարմրավորը արտաքուստ և ներքուստ խաչաձև, 6x7,5մ չափերով, տրոմպային փոխանցմամբ գմբեթավոր եկեղեցի է: Հորինվածքային տիպով նման է Լմբատավանքի Ս. Ստեփանոսին:

Ութնիստ թմբուկը պսակված է կղմինդրածածկ կորագիծ վեղարով, որը նույնանյութ և նմանաձև տարրի պահպանված հնագույն օրինակն է: Ներսում պահպանվել են որմնանկարների մնացորդներ: Քիվերը, լուսամտապսակները քանդակազարդված են: Վարպետորեն ընտրված համաչափությունների շնորհիվ ներդաշնակված ծավալներով կառույցը թողնում է միաձույլ արձանի տպավորություն: